• In Masally very hard-working, patriotic and true citizens of Azerbaijan live...
  • Heydar Aliyev
  • AZ
  • RU
  • » » BÖYÜK QƏLƏBƏDƏ MASALLI BİOLOJİ TƏBABƏTÇİLƏRİNİN DƏ PAYI VAR

    BÖYÜK QƏLƏBƏDƏ MASALLI BİOLOJİ TƏBABƏTÇİLƏRİNİN DƏ PAYI VAR

    BÖYÜK QƏLƏBƏDƏ MASALLI BİOLOJİ TƏBABƏTÇİLƏRİNİN DƏ PAYI VAR
     
     
    ƏSRİN TƏBABƏTİ – BİOLOJİ TƏNZİMLƏMƏ
     
    Masallı Bioloji Təbabət Klinikası iki yaşını qeyd edir. Bu müddət ərzində yerli və xarici pasientlərə göstərilən xidmət və əldə edilən nailiyyətlər tibb personalını daha da ruhlandırır. 
    Bioloji Təbabətin Azərbaycanda özəl klinikalarının yaradılmasının ideya müəllifi tanınmış iş adamı Elxan Yaqubovdur. O, 11 il öncə respublikamızda "Bioloji Təbabət" MMC-ni təsis edib və baş direktorudur. Bioloji Təbabət Klinikaları Şəbəkəsinin direktor müavini isə Qüdrət Yaqubovdur. Məhz bu müasir səhiyyə ocağının yaradılması ilə Azərbaycan tibb sahəsinə bir yenilik gəlib, desək yanılmarıq.
    Bakı, Sumqayıt, Göyçay filiallarından sonra cənub bölgəsində yaşayan əhalinin sağlamlıq problemlərinin həllinə kömək etmək və xarici ölkələrə xəstə axınının qarşısını almaq məqsədilə Masallı rayonunda yaradılan bu sağlamlıq ocağı orqanizmi kimyəvi preparatlarla zəhərləmədən əhaliyə müasir müalicə metodu­ – bioloji üsullarla həm ambulator, həm də stasionar tibbi xidmət göstərir. 
                                                              ***
    Vətən müharibəsinin ağ xalatlı qəhrəmanları əsgərlərimiz tək mübariz və qorxmaz mövqe sərgilədilər. Ön və arxa cəbhədə igidlərimizə dəstək, yaralılara məlhəm oldular, tarixi zəfərə öz töhfələrini verdilər.
    Qazanılan Böyük Qələbədə Masallı bioloji təbabətçilərinin də payı var. Müharibənin başladığı ilk gündən – sentyabrın 27-dən Ali Baş Komandanımıza, Ordumuza dəstək məqsədilə Müdafiə nazirliyinə, aidiyyatı təşkilatlara müraciətdən sonra tibbi avadanlıqlarla təmin edilmiş iki “Ambulans” TTY maşını ilə klinikanın həkim heyəti iki dəfə (hər ezamiyyədə 15 gün müddətinə) döyüş bölgəsinə səfərbər olub. İki ay ərzində hər həftə ön cəbhədəki əsgərlərimizə dərman vasitələri, ərzaq məhsulları göndərilib, tibbi yardımlar göstərilib.
    Bioloji Təbabət Klinikasının (BTK) Masallı filialının direktoru Sevindik Becanlı müsahibə zamanı bildirdi ki, 44 günlük İkinci Qarabağ müharibəsi dövründə iki ay hərbi hospital kimi fəaliyyət göstərən klinikamızda 100 nəfərdən artıq yaralı əsgər müalicəyə cəlb edilib. Onlara yüksək səviyyədə əməliyyat, müalicə, bərpa-reabilitasiya və digər lazımi tibbi xidmətləri göstərilib. Əlimizdən gələni edirdik ki, qəhrəmanlarımız daha tez sağalsınlar. Dekabr ayının ilk günlərindən etibarən stasionar müalicəsini başa vuran 50 əsgər evlərinə və ya hərbi hissələrə dönüblər. Müharibənin bitməsinə baxmayaraq mütəmadi olaraq, klinakımıza müraciət edən qazilərin ambulator müalicəsi aparılır. Təkcə yaralı əsgərlərə deyil, onların və şəhidlərin də ailə üzvlərinə təmənnasız tibbi yardımlar edilir...
    – Haqq savaşında qətiyyətli mövqe, möhkəm siyasi iradə nümayiş etdirən ölkə başçımız, Müzəffər Ali Baş Komandanımız İlham Əliyevin ətrafında sıx birləşməklə, sarsılmaz əzmimiz, qüdrətimiz, dəmir yumruğumuzla, şanlı Ordumuzun, əsgərlərimizin rəşadəti ilə Böyük Zəfərə imza atdıq,-deyərək, köksü iftixar hissi ilə dolu olan müsahibim qürurla əlavə etdi ki, kollektivimizin üzvü, fizioterapiya şöbəsinin müdiri Tural Əliyev Şuşaya qədər şanlı döyüş yolu keçib, hazırda könüllü əsgər kimi Vətənə xidmətini davam etdirir...
                                                                   ***
    S.Becanlı digər müalicə üsullarından fərqli olaraq, xəstəliyi deyil, xəstəni müalicə edən  bioloji üsullarla müalicənin əsl mahiyyətini açıqladı:
    – Hələ də bioloji təbabəti türkəçarə, xalq təbabəti ilə səhv salanlar var. Əslində bu, Ulu Yaradanın bizə buyurduğu təbabətdir. Çünki dünyanın əşrəfi sayılan insan orqanizmi yaradılışdan özü-özünü tənzimləmə, sağaltma, bərpa etmə qabiliyyətinə malikdir. Bioloji tənzimləyici müalicə isə orqanizmdəki bu ibtidai qabiliyyəti sanki yenidən işə salır. Müalicə zamanı digər orqan və toxumalar zədələnmir. Lakin kimyəvi dərmanlarla müalicə zamanı xəstəlik əlamətləri müvəqqəti aradan qaldırılır, gizli hala keçir və sonradan inkişaf etmiş xəstəliyin qarşısını almaq olmur.

    Paytaxtla yanaşı bölgələrdə də əhaliyə nümunəvi tibbi xidmətin göstərildiyini vurğulayan müsahib qeyd etdi ki, BTK nəinki Masallıda, cənub bölgəsində səhiyyə xidmətinin inkişafına böyük töhfədir. Pasientlər xroniki, çətin sağalan və ya sağalması mümkünsüz hesab edilən xəstəliklərin müalicəsində effektiv və təhlükəsiz müalicə üsulu sayılan bioloji təbabətlə müalicə metodlarının köməyilə öz sağlamlıqlarına qovuşurlar.
    Alman təcrübəsinin Azərbaycanda tətbiq olunması üçün BTK-da yaradılan şərait ölkənin səhiyyə sisteminin inkişafı yolunda atılan uğurlu addımlardandır.
    S.Becanlı klinikanın fəaliyyəti haqqında məlumat verdi: 
    – Ümumilikdə 120-dən artıq insanın çalışdığı klinika fəqərəarası disk yırtığı, diabetik və trofiki xoralar, əlilliyə aparan artrit, artroz, skolioz, ürək damarlarının aterosklerozu, podaqra, revmatoid artrit kimi xroniki xəstəliklərin müayinə və müalicəsi üçün beynəlxalq standartlara uyğun aparatlarla təchiz olunub.
    Bundan əlavə burada müxtəlif xəstəliklərin diaqnostikasında istifadə edilən kompüter tomoqrafiyası (KT) müasir şüa diaqnostikasında ən informativ üsullardan hesab olunur.
    Klinika son model tibbi avadanlıqlarla təchiz edilib. Diaqnozun aşkar edilməsində əhəmiyyətli və müasir diaqnostikada ən informativ üsullardan hesab olunan maqnitrezonans (MRT) və komputer tomoqrafiyaları (KT), 4D rejimli ultrasəs müayinə aparatı, rentgen, qaranlıq sahəli mikroskopiya və s. pasientlərin xidmətinə verilib. Əvvəllər genetik analizlərə görə xarici ölkələrə üz tutan pasientlər üçün klinikamızda imkan yaradılıb.
    Tibb mərkəzində təcili tibbi yardım, cərrahiyyə, allerqologiya, andrologiya, endokrinologiya, ginekologiya, kardiologiya, nevrologiya, oftalmologiya, pediatriya, qastroenterologiya, stomatologiya, urologiya və fizioterapiya şöbələri, bu ildən isə psixoloji-nitq (loqoped) və dayaq-hərəkət inkişaf mərkəzləri fəaliyyət göstərir.
    Naftalan vannaları, Naxçıvan duz dağı və alman biotənzimləyici terapiyasının birgə vəhdəti müalicənin ziyansız və uzunmüddətli, daha effektli olmasını təmin edir.
    Dünya statistikası göstərir ki, əməliyyat zamanı ölümün 60 faizinin səbəbi sterilizasiyaya (təmizlik) ciddi riayət olunmamasıdır. Buna görə də, klinikada müasir standartlara cavab verən sterilizasiya sistemi yaradılıb, hətta əməliyyat bloku və stasionar şöbənin xarici hava ilə təması tam kəsilib. Hava xüsusi qurğular vasitəsilə təmizlənərək otaqlara verilir.
    Bu gün dünyanın ən aparıcı dövlətlərinin bioloji təbabətlə məşğul olmasından, eyni zamanda bu sahə üzrə dünyaca məşhur tibb alimləri ilə əməkdaşlığın aktuallığından bəhs edən səhiyyə ocağının rəhbəri bu yönümdə aparılan işlərdən danışdı: 
    – Bildiyimiz kimi səhiyyə ocağının ən başlıca dəyəri onun tibbi personalı ilə ölçülür. Həkimlərimizin əksəriyyəti Almaniyada təhsil alıb, orada təcrübə keçiblər. Çünki alman təcrübəsi görmədən BTK-da işləmək qeyri-mümkündür. Rəsmi distributuru olduğumuz şirkət Baden-Bade şəhərində yerləşir. Kimyəvi tərkibsiz, yəni əks təsiri olmayan homeopatik dərmanlarımız da alman istehsalıdır ki, bu preparatlar dünyanın 60-dan çox ölkəsində istifadə olunur.
    Hər həftənin I, II və V günləri Bakı Bioloji Təbabət Klinikasının həkimləri filialımızda pasiyent qəbulunu həyata keçirirlər.
    Müxtəlif xəstəliklər üzrə xəstə qəbulu keçirən xarici qonaqlar bizimlə əməkdaşlıq edib, bioloji təbabətlə müalicə üsullarının ölkəmizdə təbliğinə dəstək olurlar. Bioloji təbabət üzrə ABŞ, Almaniya, İtaliya, İspaniya, Ukrayna və s. ölkələrdən dəvət olunan yüksək dərəcəli tibb mütəxəssisləri müntəzəm olaraq həkimlərimiz üçün elmi seminar-treninqlər təşkil edir, onlara mühazirələr oxuyur, eyni zamanda xəstə qəbulunu həyata keçirirlər. Sosial şəbəkələrdəki səhifələrimiz vasitəsilə bu tədbirlərin anonsu verilir.
    Coğrafi mövqecə əlverişli məkanda, Azərbaycanın cənub turistik bölgəsinin mərkəzində yerləşən Masallı Bioloji Təbabət Klinikası insanlara kurort-sanatoriya müalicəvi istirahət xidmətini də təqdim edir. Nəinki respublikamızın, dünyanın 50-ə yaxın bölgəsindən bu tibb mərkəzinə müraciət edən pasiyentlərin xəstəliklərinin müalicəsində biotənzimləyici üsullarla uğurlu nəticələr əldə olunur. Şəfaverici Naftalan vannaları (15 may - 15 sentyabr), Naxçıvan duz dağı mineralları (ilboyu), alman biotənzimləyici terapiyası və füsunkar təbiətin möhtəşəm vəhdəti hər mövsümdə insanların mükəmməl müalicə və xoş istirahətini təmin edir.
    Sanator-kurort tipli klinikanın münasib qiymətlərə təqdim etdiyi müalicəvi-istirahət paketləri  palata və ya oteldə yaşayış seçimlərini, balanslı qidalanma, gündəlik müayinə, prosedurları və s. özündə əks etdirir.
    Müsahibimdən öyrəndim ki, BTK-da vaxtaşırı olaraq ödənişsiz müayinə günləri təyin olunur, humanitar aksiyalar keçirilir. Müəyyən olunan vaxtlarda müəllimlər üçün müayinələr 20 faiz endirimlə aparılır, onlara müvafiq tövsiyələr verilir.
                                                                        ***
    Gözəgörünməz düşmən – koronavirus pandemiyası ilə mübarizənin bir nömrəli qəhrəmanları da həkimlərdir. COVİD-19 infeksiyasının yayıldığı ilk günlərdən insanların köməyinə çatan, onları bu bəladan xilas etməyə çalışan fədakar həkimlərimiz...
    Əgər bu tibb mərkəzindəki xidmət personalı, yaradılan şərait yüksək olmasayadı, klinikadakı rahatlıq da hiss olunmazdı. Məncə pasientlər də etiraf edərlər ki, keyfiyyətli müayinə-müalicə, yüksək səviyyədə görülən işlər nəticəsində onlar burada özlərini komfortlu hiss edirlər.
    Məhz yuxarıda sadalanan müsbət amillərə görə öz işini məsuliyyətlə yerinə yetirən klinika əməkdaşları insanların inam və güvənini qazanıblar. Bu çətin və təhlükəli dönəmdə Masallı Bioloji Təbabət Klinikası kollektivinin  timsalında hər bir tibb işçisinə şərəfli, məsuliyyətli peşələrində səbrli, güclü olmağı arzulayır, göstərdikləri cəsarət və fədakarlığa görə onları alqışlayırıq.
     
     AKİF AĞAYEV,
    “Yeni həyat”,      
     www.yeniheyet.az
     
     
    DİGƏR XƏBƏRLƏR
    Latest News
    1. Prezident İlham Əliyev Şağan Reabilitasiya Pansionatının açılışında iştirak edib
    2. Prezident İlham Əliyev Bakının Ramana qəsəbəsindəki yaşayış kompleksində şəhid ailələri və müharibə əlillərinə mənzillərin təqdim olunması mərasimində iştirak edib
    3. Masallıda Xocalı soyqırımı ilə bağlı anım tədbirləri keçirilib
    4. Masallıda "Nizami Gəncəvinin əsərlərinin səhnələşdirilməsi" adlı onlayn layihəyə start verilib
    5. Masallının din xadimləri Xocalı soyqırımı qurbanlarını anıblar
    6. YADDAŞLARDAN SİLİNMƏYƏN FACİƏ
    7. Masallıda “Yeni Azərbaycan Partiyası Qələbələr partiyasıdır” mövzusunda onlayn görüş keçirilib
    8. Masallı şahmatçısı respublika birinciliyində ikinci yeri tutub
    9. Uzaqgörən siyasətçi, görkəmli dövlət xadimi
    10. Masallıda "Xocalı soyqırımı XX əsrin faciəsidir" mövzusunda onlayn tədbir keçirilib
    11. Masallıda operativ qərargahın növbəti onlayn müşavirəsi keçirilib
    12. Masallıda “Ana dilimiz milli-mənəvi sərvətimizdir” mövzusunda onlayn tədbir keçirilib
    13. Masallı gəncləri qazini evində ziyarət ediblər
    14. Azərbaycanın Vətən müharibəsində qazandığı böyük qələbəsi ölkəmizin gələcək inkişafını daha da sürətləndirir
    15. "Dəmir yumruq" əməliyyatı tarixi ədaləti bərpa etdi
    16. 44 günlük müharibə milli birliyimizi, ordumuzun qüdrətini dünyaya nümayiş etdirdi
    17. Prezidentin işğaldan azad edilən rayonlara səfəri hər birimizdə qürur və nikbinlik doğurur
    18. Qarabağımız cənnətə çevrilmə mərhələsindədir
    19. Masallıda Xocalı soyqırımına həsr olunmuş virtual kompozisiya nümayiş olunub
    20. Şəhid Masim Qurbanovun 40 mərasimi
    21. Masallıda "Xocalı soyqırımı tariximizin qan yaddaşı" mövzusunda gənclərlə onlayn görüş keçirilib
    22. Masallıda Milli Qəhrəmanın xatirəsi ehtiramla yad edilib
    23. Masallılı gənclər idmançı şəhidin ailəsini ziyarət ediblər
    24. Zəfər qələbəsini həm siyasətdə, həm də döyüş meydanında qazandıq
    25. Bu səfərlər böyük tarixi əhəmiyyət kəsb edir
    26. Masallıda müharibə veteranı şöbə müdiri təyin edilib
    27. Masallı RİH başçısı peyvəndləşmə prosesi ilə tanış olub
    28. SƏNAN ƏTİRLİ TORPAQ
    29. YAP Masallı Rayon Təşkilatı şəhid ailələrini ziyarəti davam etdirir
    30. Prezident İlham Əliyev və birinci xanım Mehriban Əliyeva Füzuli, Zəngilan, Laçın və Cəbrayıl rayonlarında olublar
    31. Masallılı məşqiçi-müəllim fəxri adla mükafatlandırılıb
    32. QƏLƏBƏNİN 100-Cİ GÜNÜ
    33. Masallı gəncləri Dövlət Rəmzləri Muzeyinə ekskursiya ediblər
    34. YAP Masallı Rayon Təşkilatının onlayn hesabat yığıncağı keçirilib
    35. Masallı Xalq Teatrı virtual tamaşa-kompozisiya ilə çıxış edib
    36. Masallıda arıçılıq təsərrüfatlarının sayı artıb
    37. Ombudsman Masallıda şəhid ailələrini ziyarət edib
    38. Masallıda ümumi məhsul istehsalında artım qeydə alınıb
    39. Bir milyona yaxın əhalimizin öz dədə-baba yurdlarına qayıtması əlbəttə ki, Böyük Qayıdışdır
    40. Milli prioritetlərin mütləq üstünlüyü bu proqramda öz əksini tapacaq
    Azərbaycana dadlı səyahət: Şamaxı, Qusar və Masallı kulinariyası
    Azərbaycana dadlı səyahət: Şamaxı, Qusar və Masallı kulinariyası
      Azərbaycana dadlı səyahət: Şamaxı, Qusar və Masallı kulinariyası   Azərbaycanlılar ağızlarının dadını bilirlər. Özü də burada Ətraflı oxu
    Azərbaycana dadlı səyahət: Şamaxı, Qusar və Masallı kulinariyası
    Azərbaycana dadlı səyahət: Şamaxı, Qusar və Masallı kulinariyası
      Azərbaycana dadlı səyahət: Şamaxı, Qusar və Masallı kulinariyası   Azərbaycanlılar ağızlarının dadını bilirlər. Özü də burada Ətraflı oxu
    All news
    «     2021    »
    1234567
    891011121314
    15161718192021
    22232425262728
    World News